အေးချမ်းမြေ့ | စက်တင်ဘာ ၁၈၊ ၂၀၀၈
မြန်မာပြည်အပါအဝင် နိုင်ငံ ၅ နိုင်ငံသို့ တင်သွင်းနေသော တရုတ်ကုမ္ပဏီ ၂ ခုမှ နို့မှုန့်တံဆိပ် ၃ မျိုးကို တရုတ်အစိုးရက အသက် အန္တရာယ်ဖြစ်စေသော အဆိပ်များ ပါဝင်သည်ဟု ဆုံးဖြတ်၍ ဈေးကွက်အတွင်းမှ စတင် သိမ်းဆည်းပြီဖြစ်ကြောင်း မကြာသေးမီက ကြေညာချက် ထုတ်ပြန်လိုက်သော်လည်း မြန်မာ အစိုးရပိုင် သတင်းစာများတွင် သတိပေးကြေညာမှုများ မလုပ်သေးသည်ကို တွေ့ရှိရသည်။
Yashili၊ Sancarl နှင့် Suokang ဆိုသည့် တရုတ်နို့မှုန့် ၃ မျိုးတွင် အဆိပ်သင့် မယ်လမင်း ပါဝင်နေသည်ကို တွေ့ရပြီး မြန်မာ၊ ဘင်္ဂလားဒေ့ရှ်၊ ယီမင်၊ ဘာရန်တီနှင့် ဂါဗွန်းနိုင်ငံများကို တင်သွင်းခဲ့သည်။ ယခုအခါ အဆိပ်ပါဝင်သည်ဟု စစ်ဆေးတွေ့ရှိချက် ကြောင့် ယီမင်၊ ဘာရန်တီနှင့် ဂါဗွန်းနိုင်ငံများမှ ၎င်းတံဆိပ် နို့မှုန့်များကို ပြန်လည်သိမ်းဆည်း နေပြီဖြစ်သည်။
မြန်မာစစ်အစိုးရပိုင် မြန်မာ့အလင်းသတင်းစာတွင် နိုင်ငံတကာသတင်း ကဏ္ဍ၌ ၎င်းနို့မှုန့် သတင်းကို ဖော်ပြထားသော်လည်း မြန်မာပြည်သို့ တင်သွင်းနေကြောင်း ဖော်ပြခြင်း မရှိပေ။
“ပြောရရင် ဒါနိုင်ငံတော်လျှို့ဝှက်ချက်လည်း မဟုတ်ဘူး။ ဘာမူဝါဒမှ ချိုးဖောက်တာလည်း မဟုတ်ဘူး။ ထိမ်ချန်လုိ့ ဘာအကျိုးစီးပွား ရမှာလည်း။ ပြည်သူကို အသိပေးသင့်တဲ့ကိစ္စ သေချာပြောသင့်တယ်” ဟု ကုမ္ပဏီဝန်ထမ်း လူငယ်တဦးကပြောသည်။
အင်္ဂလိပ်ဘာသာထုတ် သည်နယူးလိုက်အော့ဖ် မြန်မာ သတင်းစာတွင်မူ နို့မှုန့်များကို တင်သွင်းသည့် နိုင်ငံများ စာရင်း၌ မြန်မာပြည် ပါဝင်ကြောင်း ဖော်ပြထားသည်ကို တွေ့ရသည်။
“သတင်းစာက စုစုပေါင်းမှ မြန်မာလို ၂ စောင် အင်္ဂလိပ်လိုတစောင်ရှိတာ အရေးကြီးတဲ့ ကိစ္စဆို လုံးဝ မဖော်ပြလို့မဖြစ်မှ တစောင် လောက်မှာပဲ ခပ်ဝါးဝါးအဲလို ဖော်ပြနေကျ” ဟု ၎င်း လူငယ်ကဆက်ပြောသည်။
မြန်မာပြည်တွင် လူအများစုမှာ တရုတ်ပြည်မှ တင်သွင်းနေသော နို့မှုန့်များကိုသာ အားကိုးနေရသည်ဟု စီးပွားရေးလုပ်ငန်းရှင်တဦးက သုံးသပ်သည်။
“နို့မှုန့်တံဆိပ်တွေက အများကြီးပဲ။ အားလုံးက တရုတ်ကသွင်းတာချည်းပဲ။ အများစုက ဘယ်တံဆိပ်ရယ် ဘာရယ်မဟုတ်ဘူး ဈေးသက်သာတာ ဝယ်သုံးနေကြတာ” ဟု သူကပြောသည်။
၎င်း အန္တရာယ်ရှိနို့မှုန့်များ စားသုံးမှုကြောင့် ကလေး ၃ ဦး သေဆုံးကာ ၁၅၈ ဦး ကျောက်ကပ် ဝေဒနာ အပြင်းအထန် ခံစားနေရသည်ဟု တရုတ်ပြည် ကျန်းမာရေးဝန်ကြီးချန်ဇူးက မနေ့ကထုတ်ပြန်ကြေညာ လိုက်သည်။ ထိုကြေညာချက်တွင် ကလေး ၆ ထောင်ကျော်မှာ ထိုနို့မှုန့်များကြောင့် နာမကျန်းဖြစ်လျှက် ရှိသည်ဟု ပါဝင်သည်။
“တကယ်အန္တရာယ်ရှိတယ်လို့ တရုတ်ကတောင် ကြေညာနေပြီဆိုရင် မြန်မာသတင်းစာတွေ၊ ရုပ်မြင်သံကြား တွေ၊ ဂျာနယ်တွေကနေ သေသေချာချာ ဖော်ပြပေးသင့်တယ်။ အဲလို ဖော်ပြမယ်ဆိုရင်လည်း သတင်းစာနဲ့ ရုပ်မြင်သံကြားသတင်းမှာထက် လူဖတ်များတဲ့ ဂျာနယ်တွေနဲ့ လူကြည့်များတဲ့ ကိုရီးယား ဇာတ်လမ်းတွဲတွေ ဘောလုံးပွဲတွေမှာ ကြားဖြတ်ပြီး ကြေညာပေးသင့်တယ်။ သတင်းစာက ဘယ်သူမှ မဖတ်ဘူး။ ရုပ်မြင်သံကြား သတင်းကလည်း ဘယ်သူမှကြည့်တာမဟုတ်ဘူးလေ” ဟု ရန်ကုန်မြို့နေ ကလေးဖခင် တဦးကပြောသည်။
မြန်မာပြည်ရှိ အပတ်စဉ်ထုတ် ဂျာနယ်များတွင်မူ ၎င်းသတင်းကို နိုင်ငံတကာသတင်း အနေနှင့် ဖော်ပြ မည်ဖြစ်သော်လည်း မြန်မာပြည်နှင့် ပတ်သက်နေသည့် ကိစ္စရပ်ကိုမူ ဖော်ပြခွင့်ရ မရ မသိသေးဟု ရန်ကုန်အခြေစိုက် သတင်းသမား တဦးကပြောသည်
Friday, September 19, 2008
အန္တရာယ်ရှိ တရုတ်နို့မှုန့်များအကြောင်း စစ်အစိုးရ ရှင်းလင်းစွာ သတိပေးခြင်းမရှိ
Subscribe to:
Post Comments (Atom)
No comments:
Post a Comment