လူ့အခွင့်အရေး ရှေ့နေ အဖမ်းခံရ

Monday, 19 January 2009 18:57 အေးလဲ့

လူ့အခွင့်အရေး အမှုလိုက် ရှေ့နေ ကိုဖိုးဖြူအား မကွေးမြို့တွင် အာဏာပိုင်များက ဖမ်းဆီး ထားကြောင်း ၎င်းနှင့် နီးစပ်သူများက ပြောသည်။

အဆိုပါ ကိုဖိုးဖြူကို လွန်ခဲ့သည့် အပတ် ကြာသပတေးနေ့က မကွေးတိုင်း အောင်လံမြို့အထွက်တွင် ဖမ်းဆီး သွားခြင်းဖြစ်သည်ဟု အောင်လံမြို့နေ ကိုဖိုးဖြူ၏ မိတ်ဆွေတဦးက ပြောပြသည်။

“ပြီးခဲ့တဲ့ ၁၅ရက်နေ့ညပိုင်း အောင်လံမြို့အထွက်ဂိတ်မှာ ရဲက ဖမ်းသွားတယ်လို့ ကြားတယ်၊ နောက်ပြီး မကွေးကို ပို့လိုက်တယ်လို့လည်း ကြားတယ်၊ အခုလို ဖမ်းသွားတာနဲ့ ပတ်သက်ပြီး သူ့အိမ်ကိုလည်း အကြောင်းမကြားသေးဘူးလို့သိရတယ်၊ ၁၇ ရက်နေ့ကမှ သိရပါတယ်”ဟု ၎င်းကပြောသည်။

ရှေ့နေကိုဖိုးဖြူ ဖမ်းဆီးခံရသည့် ကိစ္စနှင့် ပတ်သက်ပြီး မကွေးတိုင်း အမှတ် (၁)ရဲစခန်းကို ဆက်သွယ် မေးမြန်း ပါသော်လည်း ပြန်လည်ဖြေကြားခြင်း မရှိပေ။

ကိုဖိုးဖြူအား ယခုဖမ်းဆီးခြင်းမှာ ဒုတိယအကြိမ် ဖြစ်သည်။ ယခုလဆန်းပိုင်း ၁ ရက်နေ့က ကိုဖိုးဖြူသည် မကွေးကားဂိတ်တွင် ပထမအကြိမ် ခေါ်ယူစစ်ဆေးခံရကာ အမှုလိုက် မှတ်စုစာအုပ် သိမ်းဆည်းခြင်း ခံရ ကြောင်းကို ၎င်းအဖမ်းမခံရခင်က ဧရာဝတီကိုပြောခဲ့ဖူးသည်။

မကွေးခရိုင်တရားရုံးမှအပြန် ညအချိန် တည်းခိုရန် တည်းခိုခန်းများက တည်းခိုခွင့်မပေးသဖြင့် မြို့ထဲတွင် ၁နာရီကျော်ကြာလမ်းလျှောက်ခဲ့ရပြီး ည၁၁နာရီ ခန့် မကွေးကားဂိတ်သို့ ရောက်ရှိချိန် ရဲ များက ကိုဖိုးဖြူ ကို မကွေးမြို့ ရဲစခန်း အမှတ် ၁ သို့ ခေါ်ဆောင်သွားကြောင်း ရှေ့နေကိုဖိုးဖြူက ပြောခဲ့သည်။

“မသင်္ကာစရာရှိလို့ခေါ်တယ်လို့ပြောတယ်၊ ကျနော့်အိတ်ကို စစ်ဆေးတယ်၊ ဘာပြစ်မှုမှ ကျူးလွန်တဲ့ အထောက်အထား မတွေ့ရှိဘူး၊ မကွေးမြို့ အမှတ်(၁) ရဲစခန်း မြို့နယ်မှူး ဦးကြူအေးဆိုတဲ့ သူက နေ့စဉ် မှတ်စုကို သိမ်းသွားတယ်၊ အစိုးရကို အကြည်ညိုပျက်စေတဲ့၊ ထိခိုက်စေတဲ့၊ စာသား အမှတ်အသားတွေ ဖြစ်တယ်ဆိုပြီး သူက စွပ်စွဲပါတယ်”ဟု ကိုဖိုးဖြူက ပြောပြသည်။

“တရားခွင်ပေါ်က လူ့အခွင့်အရေး ရုန်းကန်မှု မှတ်တမ်းများ”ဟု အမည်ပေးထားသည့် ၎င်း၏ မှတ်စုတွင် အဖမ်းခံထားရသည့် ရှေ့နေ ကိုညီညီထွေး၊ ထိုင်းနိုင်ငံသို့ တိမ်းရှောင်ခဲ့သည့် ရှေ့နေ ကိုစောကျော်ကျော်မင်း တို့၏ တရားရုံး လျှောက်လှဲချက်များ၊ ဥပဒေအကြောင်းအရာ မှတ်တမ်းများ စသည်တို့ ပါရှိကြောင်းလည်း ကိုဖိုးဖြူက ပြောဆိုသည်။

ကိုဖိုးဖြူသည် မကွေးတိုင်း နတ်မောက်မြို့နယ် ရွာမွန်ရွာ ကျေးရွာအုပ်စုရှိ တောင်သူလယ်သမားများ၏ လယ်မြေကို တပ်မြေအဖြစ်သိမ်းပြီး ကြက်ဆူပင် စိုက်ပျိုးခိုင်းသည့် ကိစ္စနှင့်ပတ်သက်၍ ရန်ကုန်မြို့ရှိ ကမ္ဘာ့ အလုပ်သမား အဖွဲ့ချုပ် (အိုင်အယ်လ်အို )ရုံးသို့ စာရေးတိုင်သောကြောင့် တရားစွဲခံရသော နတ်မောက်မြို့ မှ လယ်သမား ဦးလှစိုးနှင့် အောင်လံမြို့မှ ကိုဇော်ဌေး တို့အမှုကို လိုက်ပါအကျိုးဆောင်ရင်း ယခုကဲ့သို့ ဖမ်းဆီး ခံရခြင်း ဖြစ်ကြောင်း သိရသည်။


ကိုဖိုးဖြူက “ကျနော်ပြောနိုင်တာ တခုတော့ရှိပါတယ်၊ တောင်သူ လယ်သမားတွေရဲ့အရေး၊ အကျဉ်း ကျ နိုင်ငံရေး အကျဉ်းသားတွေ အရေး၊ ဘုန်းကြီးသံဃာတွေရဲ့ကိစ္စတွေ၊ လူ့အခွင့်အရေးဆိုင်ရာတွေ ဆောင်ရွက် လို့ ပြစ်ဒဏ် တွေချမယ် ထောင်ဒဏ် တွေချမယ် ဆိုရင် ကျနော့်ကိုတရားတွေစွဲလှည့်ပါ၊ ပုဒ်မတွေ အများကြီး တပ်လှည့်ပါ၊ အဲဒါတွေ ရင်ဆိုင်ဖို့အသင့်ပါပဲ၊ ဥပဒေဆိုတာ ပြည်သူတွေကို ကာကွယ်ပေးတဲ့ ဥပဒေသာလျှင် ပြည်သူ့ဥပဒေ ဖြစ်ပါတယ်”ဟု ပြောခဲ့သည်။

ပြီးခဲ့သည့်နှစ် နိုဝင်ဘာလအတွင်းကလည်း စစ်အာဏာပိုင်များက တရားရုံးကို မထီမဲ့မြင်ပြုမှု၊ တရားစီရင်ရေး ကို နှောင့်ယှက်မှုများဖြင့် ရှေ့နေကိုညီညီထွေးကို ထောင်ဒဏ် ၆လချမှတ် ခဲ့ပြီး ရှေ့နေကြီး ဦးအောင်သိန်းနှင့် ဦးခင်မောင်ရှိန်တို့ကိုလည်း ထောင်ဒဏ် ၄လစီချမှတ်လိုက် ခဲ့သည်။ တခြားသော ရှေ့နေ ကိုစောကျော်ကျော် မင်း သည်လည်း ထိုင်းနိုင်ငံဘက်သို့ တိမ်းရှောင်ခဲ့သည်။